ازاي تختاري حجابك

تعالى الاول اقولك كلمتين مهمين فى ودنك

أغلب البنات النهارده محجبات وأصبح اهتمامهم بالحجاب يوازي أو يفوق اهتمامهم بشعرهم، وأصبح البديل للكوافير والبحث عن قصة جديدة أو لون مختلف هو لف الطرحة بألوان زاهية على آخر موضة.. أشكال ربطات على هيئة تسريحة شعر "ضفيرة وكحكة"، وأما الأقمشة (دي فيها كلام كتير) "تل" و"شيفون" "وترتر"، الصبح والضهر وفي كل وقت...

المعادلة الصعبة في كل الحاجات دي ازاي أكون محجبة أحترم "حجابي" وفي نفس الوقت شكلي حلو "ستايل" على الموضة ومش "مبهرج" ولافت للنظر لدرجة تثير انتقاد الآخرين..

...ألوان الموضة في الإيشاربات لصيف 2008...

لون الطرحة حسب لون اللبس ولكن اللون الاصفر والاخضر هم الأساس السنة دي وبيدخل معاهم البرتقالي و البتنجانى , الزيتي بدرجاته, الاصفر لوحده او الاصفر مع لون تانى موضة جداً واستخدام الألوان الجديدة وتداخلها بيعطي نتيجة حلوه جداً..

ازاي تختاري خامة أو قماش الإيشارب صح؟

نوع القماش أو خامة الإيشارب تعتمد على نوع اللبس، كمان فيه أنواع من الأقمشة من المفضل نتجنبها حتى لو عجبك لونها أو تطريزها أو نقشتها.. من الأقمشة المزعجة في لبس الحجاب "الأوراجنزا الهايشة".. ابعدي عن الأقمشة "الناشفة" لأنها صعبة في الربط، خلي عنيكِِ على نوعية الأقمشة الناعمة والأقطان، الحرير، الحرير على قطن، الشيفونات بأنواعها كلها خامات حلوة جداً ومناسبة وعملية والتل كمان... بأكد إن الإيشارب مهم إنه يكون عملي في اللف، ممكن الإيشارب يكون غالي ووحش في ربطته وبعد شوية هتكرهي الإيشارب وهتركنيه على جنب بعد ما غرمتي ثمنه. بس ممكن لو فى مناسبه تستخدمى القماشه الهايشه علشان تساعدك فى الاسبانش بس معاها طرحه اخرى ناعمه علشان متضايقكيش فى ربطتها

نوعية القماش المناسبة والعملية للبنت في الجامعة عشان يكون حجابها مريح وفي نفس الوقت شكلها مش مبهدل؟

تختار الأقطان والشيفونات المطفية "بدون لمعة".. الأقمشة دي بتستحمل جداً الحركة طول النهار، فالأقطان فيها ألوان كثيرة وأشكالها حلوة جداً، والقطن على حرير فيه تطريز خفيف حلو كمان وموضة جداً يكون في طرف الإيشارب تطريز أو ترتر بس المهم يكون "Simple" جداً.. عشان الجامعة ممكن تختار الإيشاربات الأقطان المخططة أو المنقوشة، فيه مساحة تنوع النهارده وألوان ينفع تدخل مع بعض تدي شكل جديد في كل مرة.

مساحة التطريز المقبولة في الصبح وخاصة إنها موضة جداً، وأغلب الإيشاربات فيها تطريز بأشكال مختلفة؟

مافيش حاجة محددة... فيه حاجات مطرزة لكن ممكن تناسب الصبح ونصيحتي لو الإيشارب فيه تطريز خلي هدومك "Simple" جداً على قد ما تقدري.

....نصائح لحجابك.....

-إيه الربطة اللي تربطيها بحيث ماتكرهيش الحجاب؟

مبدئياً تحاولى على قد ما تقدرى تلبسى ألوان فاتحة لأن الغامق بيغمق البشرة، وبيدي سن أكبر، ومش مبهج في كل الأحوال.. وأصلاً الموضة دلوقتي الألوان الفاتحة لأننا داخلين على الربيع والصيف.

أما الربطة فتحاولى على حسب وشك تختارى الربطة المناسبة.

لو وجهها طويل؟

الربطة العادية مناسبة.. علشان تبرز الخدود تجيب الطرحة بعد الودان على طول ونربطها من الأمام بحيث الخدود تكون بارزة وده هيقلل أو هيحد من طول الوجه.

والربطه العادية كويسة قوي.. كمان للناس اللي عندهم "لغد"... تعتبر أنسب ربطة..

والوجه المدور..؟!!

كل حاجة بتمشي مع الوجه المدور، لكن المدور قوي من تحت فمش مستحب الـSpanish لأنها بتملاه أكثر.

لو واحدة جبهتها عريضة تعالج ده ازاي؟

هنا بنحاول إن الربطة ماتكونش صغيرة، يعني نحاول ندي الوش حجم بحيث يتم الحد من عرض الجبهة.

هل البشرة ممكن تتدخل في اختيار الطرحة؟

لو البشرة تعبانة بنحاول نختار ألوان قوية ده بيعمل زي خداع بصري...

لو واحدة شقراء وعينيها ملونة إيه أفضل الألوان؟!

نصيحتي تبعد عن لون عينيها، يعني بلاش أزرق أو أخضر ممكن تختار الـ Hot colorsالألوان الساخنة درجات "الأحمر- البرتقالي الأصفر" عشان الطرحة تظهر جمالها وممكن لو حابّة تحط إكسسوار يكون لون عينيها...

- ولو واحدة بيضاء وعينيها بني أو عسلي؟

تعلم Mix بين الـHot colors الأحمر والأصفر والبرتقالي طبعا بدرجاتهم حسب لبسها وبين الـ cool colorsالأزرق والسماوي والأخضر والبيج، يعني تمزج بين الألوان الفاتحة والغامقة.. على فكرة المزج بيدي شكل جميل جدا للوجه وبيبرز جماله أكتر.

ولو خمرية وعينيها ملونة!!!!

يبقى حلو جدا عليها الـHot colors -أحمر وأصفر وبرتقالي- وتكون أحلى مع الأحمر..

والخمرية وعينيها بني أو عسلي؟

تختار الـHot colors أحمر وأصفر وبرتقالي... وتبعد عن الأزرق أو اللبني ولو عايزة تعمل Mix بين الـHot، Coolيكون الـCool أكثر يعني مثلاً لو عايزة تلبس بيج في تركواز يكون التركواز أكثر. لأن التركواز لون بارد.